غابات النخيل

من الايام الخولى نتذكر ان المساحات التى تمتد من بيت عبد الرضى جبارة وحتى جاد الله و حتى مكان النادى القديم كانت رملاء صعبة المراس خالية من الغابات الحالية ( ربى يزيد و يبارك )ما عدا تمر حسن فضل السيد و تمر جاركيل و كانت رملة صعبة خالص وكانت صعوبتها تتعرف عندما يطلبوا من بتاع اى لورى بان يجى فى مترة عمر مثلا عشان يملو العربية برتقال ايام البلد بخيرها كانت اى عربة مهما كانت لابد من الوحل وخاصة عندما تكون يادووب مندلى وكانها فى ابو ضلوع ....و نواصل

ومن الزكريات كذلك كان ضل نيمتنا يتجه الى مكان المسكيت الذى كان فى مكان شتل عبدالمنعم عوضالله واحمد بشير ( الله لا يعيد المسكيت )و كنا فى بعض المرات نبارى الضل حتى ذاك المكان وكان الاهل يخوفوننا بالقلعة الاتحت من ناس كمال موسى ويقولون لنا بانها مسكونة عشان ما نمشى هناك ..و من البيوت حقتنا والى الامام مافى حاجة غير بيوت الجلياب والعيادة وهناك الطاحونة و المدرسة ..وجدول البى كان ليهو شنة ورنة لانو كان شئ مهم لينا بهايمنا وحميرنا ......و نواصل

ووننتظر

نتذكر ايام خلاص عاوزين يقسمو النمر بتاعات القوز الحلية و حضور المساح من الدبة و معاهو معداته (( مناظير المساحة )) ((الكشمبيرات )) و معاهم فى الكومر و اللورى حجار الاسمنت (الحدود)و اتذكر جيدا المساح كان مبسوط لانو ما وجد اى صعوبة او مشاكل فى وضع الحدود و تقسيم النمر بل كان ناس البلد يساعدو اعمال المساحة فى انزال حجارة المساحة فى مكانها المطلوب.. و من ذاك الوقت بدا اهلنا فى عملية التعمير و لله الحمد مازال التعمير مستمر....و نواصل

بحمد الله بعد التقسيم بقى كل زول يعمر فى حقو وشوى شوى بقت اشجار النخيل تطلع من الحفر و صارت اليوم ولله الحمد تعانق عنان السماء ...يجب على كل الاهل العمل بوصية رسولنا الكريم صلى الله عليه وسلم التى وصانا بها حين قال [((اكرموعمتكم النخلة ))و الكل يعلم باننا نستفيد من كل اجزاء النخلة من الكروق و الاشميق و الجريد و الفليق ...الناظر اليوم للنخيل يجب ان يشكر الله كثيراعلى هذه النعمة ....

احمد بابكر طال انتظارنا
وين انت ؟؟؟؟؟؟

الترعه ربنا يتمها يا الجندي
وتزيد العمار يااااااااااااااااب

سوف نكتب عن غابات النخيل و غابات البرتقال التى سادة ثم بادة لاسباب معروفة لديكم منها عامل الزمن ومنها عامل ضيق ذات اليد للاهالى فى السنوات الصعيبة الاخيرة .....سوف نكتب عن السواقى التى كونت مشروع جرا التحت ((جرا بحرى )) ولكن هذه المرة المعلومات من جدى قاسم عبدالله محمودعلى الامين ربنا يطول فى عمره .....و نواصل

سالت جدنا قاسم عبدالله عن حدود جرا القد يمة فقال ان حدود جرا مع نهاية ساقية العرب من لا بحرى و اصل اهل ساقية العرب انهم عرب من الشايقية من قرية يقال لها ((جرق )) ومن لا قبلى ساقية البنا ((كانت تسمى زمان كوع البنا)) و قد قامت البوابير عام 1951 و كانت تسقى الى اخر ساقية فى د بة الفقراء ((الحلة ))الاسم القد يم لد بة الفقراء الحالية . والسبب الجاب المشكلة القد يمة بين جرا ود بة الفقراء هم الانجليز الله لاعادهم فى كل مكان مشوا فيه عملوا فتن كانوا محد د يين عشرة سنوات لانفصال مشروع جرا عن د بة الفقراء . مع العلم بان اهلنا فى جرا كانوا مستفيد ين من الجدول وكانوا معفيين عن الضرائب لعدة سنوات ......الظاهر عناد اهلنا الجراوة مورث من قديم.

الليلى راح نكتب السواقىالتى كونت مشروع حرا التحت 1-ساقية العرب 2-ساقية الجزولى 3-ابكر ود ناصر ((من دبة الفقراء))4-ساقية هبشى ((مكى المطيب و حاج محمد المطيب/)) 5-ساقية ابوزيد ((اصلهم كوارتا)) 6-ساقية سيداحمد ((اصلهم من مورا)) 7/محمد ود ابو د لق ((من قوشابى)) 8/ ود عوضة ((عبد الحميد و عوضة ...و اصلهم من القدار)) 9/ود حمد ((اصلهم كوارتا)) 10/سليمان ((من د بة الفقراء)) 11/ساقية موسى كد ودة((عرب شايقية ...من قرية خنك))12/..................((راحت على جدى مع اصراره بان هناك لخبطة من الاول))13/ساقية محمود ((عرب من ابكر ))14/ ساقية البى((المنقولة))15/ساقية محمد ود النو 16/ساقية ابراهيم 17/ساقية متى 18/ساقية محمد ود ضرار ((من ابكر ))19/ساقية البنا((كوع البنا ...(فوراوى)...))20/اب شرى ((احميدى )).........اماالمترات فهى لم تكن تشرب مع السواقى من البداية وهى 1/مترة عمر 2/مترة موسى 3/مترة ابكر 4/مترة محجوب فضل5/ مترة ابروب .....زمان كانت بعيدة عن المشروع .....و نواصل

الانجليز عملو الحفير عشان يسقى جرا و دبة الفقراء وكرمكول وقد كان .الحفير كان يسقى تلك الاراضى كل سنة مع الدميرى وكان يسقى جرا بعد ما يغمر دبة الفقراء .والحفير كان يمر بمترة محمد ود النو وساقية المنقولة و ساقية محمود......وقد تم تعويضهم فى العفاض ((فى جزيرة الفول ))((او جزيرة الفونج)) ونحن لم نشوف الحفير وهو مليان موية ولكن شفنا المجرى بتاعو بل فى بعض المحلات مجراه لم يتردم حتى الان. ويقال ان الحفير تم حفره عام 1917م.و بكرة نواصل بمشئة الله