تمن الغربه

موضوع: تمن الغربه 25/4/2009, 01:56

إهداء الى كل سودانى بعيدًا عن وطنه

تمن الغربه بندفع فيهو من اعمارنا وروحنا كــــــــــمان
سِبنا بلدنا وسِبنا اهلنا وجينا نقاسى اســـــــــــى واحزان
كل املنا بقى فــــــــــــى الرجعه للسودان البيهو بنتباهى
من فارقنا حبايب لينــــــــــــــا وجينا الغربه وفيها شقينا
ما صادفنا الفرحه تزورنا ولا صادفنا البسمـــــــه تجينا
لقينا الدنيا حزينه حزينه وعيشــــة الغُربه مسيخه وشينه
ما زى عيشة البلــــد الحانى وطعمها سكر وحلوه وزينه
ليل الغُربه مــــــــــــــا زى ليلك وآه يابلدى وإنتى حليلك
قمرك ضاوى وقمر الغربه باهت نورو تعـــالى احكيلك
شفتى المويه هنا ما بتروى حليل حلاوة موية نيـلـــــــك
وإنتــــــــــــى حليلــــــــــــــــــــــــــــــــــــك يابلــــــدى

موضوع: رد: تمن الغربه 26/4/2009, 10:19

كلمات تنسجم وواقع الغربه ويفهمها جيد من ارتوى من علقمها
لك التحيه
ولى استيضاح هل انت شقيق مرتضى وياسر
مع خالص الود

موضوع: رد: تمن الغربه 26/4/2009, 19:37

سلام
أيوه ياكمال احمد درار هو شقيقنا الاصغر
وهو في فرنسا حالياً وليهو 6 شهور تقريباً
وكابي الجرسة والبكاء
وشي شعر وشي اهأت وشي ما بنعرفوا
لما يصل 6 سنين او يصل سنين غربتي وغربتك
ح يكون بقي شاعر ذي المتنبئ

موضوع: رد: تمن الغربه 27/4/2009, 11:30

سلام مكعب
مرتضى واحمد
ياخى احمد دا انا ازكرتو ولو قلت ليك شفتو متين ماتصدق
لما كان العزابه ماجرين بيت حسن الخال جنبكم فى ديم النور محجوب الباشا ومالك عمر حامد والخواجه واحمدا دا كان شافع صغير كان هادى الطبع ويميل للخجل وكنت بشوفو فى الشارع مع الشفع . ياخى نحن عجزنا والله
وياحمد بطل الجرسه وخليك صنديد والغربه تصنع الرجال وخاصة انت ابن المرحوم رعيل جرا الاول فى الاغتراب
وطالما ما اخوك مرتضى حتكون قدرها شرطا مايكون عندك عقاب وراك (حنان) والله يصرفن هن البمصخن الغربه
تمنياتنا ليك بالتوفيق فى مساعيك وتاكد ليك اخ اخر قريب ليك ممكن تتواصل معى عبر التلفون وتلفونى انا كتبتو لمرتضى فى البوست بتاعى وتعال نوريك وسائل اتصال عالميه ملح...
مرتضى ان اضفتك فى الماسنجر واتمنى نتلاقى بهناك
والشكر لكم يا الدراراب اولاد متى بكسر الميم

موضوع: رد: تمن الغربه 27/4/2009, 18:32

تسلم يا كميو

ياخي انت قديم خلاص
من زمن عزابة ديم النور ؟؟؟
انا مرقت من بورتسودان للسعودية وتاني ما شفتها حتي الان

الجني دا مكتول في واحدة شايقية موراهو نجوم الضهر
عشان كدي يهضرب شعر وآهات وبلاوي متلتله
مرات يقول خلاها قبل يسافر
ومرات يمسك التلفون ينقنق معاها الليل كلو
ما قادرين نفهم الحاصل شنو

موضوع: رد: تمن الغربه 27/4/2009, 19:35

يا كيمو اعمل حسابك حبوبة بي تقرأ الكلام دا
ويا معاوية والزين الحقو
مرتضى اعلنها داوية

موضوع: رد: تمن الغربه 27/4/2009, 23:44

سلام يا كمال كيف صحتك واحوالك والف مبروك الخطوبه
وربنا يوفقك...وكفاك غربه..إنت من زمن ديم
النور والله كبرت حصّل نفسك...

موضوع: رد: تمن الغربه 29/4/2009, 13:59

كتب keriko

حتكون قدرها شرطا مايكون عندك عقاب وراك (حنان)
والله يصرفن هن البمصخن الغربه

حباااااااااااااااااااااااااب ألحقي شوفي كمال قال شنو
( انا غايتو بره لافتنت ولا حدثت زول )

مرتضى السر لك التحيه وحبابك عشره
وانت جايي خاشي شمال من وين
وفكيت آخر احمد
وكان عامل فيها ماعندو ( حنان)
وطلعت شايقيه كمان ,,,,,,,,,,,,
جنس جرســــــــــــــــــــــــــــه

موضوع: رد: تمن الغربه 4/5/2009, 00:34

كمان يا معاويه قدم لى رشوة عشان احزف كلام مرتضى
سجل ياتاريخ

موضوع: رد: تمن الغربه 4/5/2009, 01:12

[]انا ما عارف مرتضى قاصد منو بالكلام دا...وما فاهم حاجه
يا معاويه انا اسيب بنات جِرا ديل كلهم وامشى لى
شايقيه عليك الله يـــا معاويه
احسن من بناتنا
ديل نلقى
ويييييييين

وبعدين لسه الواحد طالب والمشوار طوييييل...[/

موضوع: رد: تمن الغربه 10/5/2009, 15:52

بقيت طالب يا دوب واللا شنو
زمان ما كنت طالب